מקור זכריה י״ג
1 בַּיּ֣וֹם הַה֗וּא יִֽהְיֶה֙ מָק֣וֹר נִפְתָּ֔ח לְבֵ֥ית דָּוִ֖יד וּלְיֹשְׁבֵ֣י יְרוּשָׁלָ֑͏ִם לְחַטַּ֖את וּלְנִדָּֽה׃
2 וְהָיָה֩ בַיּ֨וֹם הַה֜וּא נְאֻ֣ם יְהֹוָ֣ה צְבָא֗וֹת אַכְרִ֞ית אֶת־שְׁמ֤וֹת הָעֲצַבִּים֙ מִן־הָאָ֔רֶץ וְלֹ֥א יִזָּכְר֖וּ ע֑וֹד וְגַ֧ם אֶת־הַנְּבִיאִ֛ים וְאֶת־ר֥וּחַ הַטֻּמְאָ֖ה אַעֲבִ֥יר מִן־הָאָֽרֶץ׃
3 וְהָיָ֗ה כִּי־יִנָּבֵ֣א אִישׁ֮ עוֹד֒ וְאָמְר֣וּ אֵ֠לָ֠יו אָבִ֨יו וְאִמּ֤וֹ יֹֽלְדָיו֙ לֹ֣א תִֽחְיֶ֔ה כִּ֛י שֶׁ֥קֶר דִּבַּ֖רְתָּ בְּשֵׁ֣ם יְהֹוָ֑ה וּדְקָרֻ֜הוּ אָבִ֧יהוּ וְאִמּ֛וֹ יֹלְדָ֖יו בְּהִנָּֽבְאֽוֹ׃
4 וְהָיָ֣ה בַּיּ֣וֹם הַה֗וּא יֵבֹ֧שׁוּ הַנְּבִיאִ֛ים אִ֥ישׁ מֵחֶזְיֹנ֖וֹ בְּהִנָּֽבְאֹת֑וֹ וְלֹ֧א יִלְבְּשׁ֛וּ אַדֶּ֥רֶת שֵׂעָ֖ר לְמַ֥עַן כַּחֵֽשׁ׃
5 וְאָמַ֕ר לֹ֥א נָבִ֖יא אָנֹ֑כִי אִישׁ־עֹבֵ֤ד אֲדָמָה֙ אָנֹ֔כִי כִּ֥י אָדָ֖ם הִקְנַ֥נִי מִנְּעוּרָֽי׃
6 וְאָמַ֣ר אֵלָ֔יו מָ֧ה הַמַּכּ֛וֹת הָאֵ֖לֶּה בֵּ֣ין יָדֶ֑יךָ וְאָמַ֕ר אֲשֶׁ֥ר הֻכֵּ֖יתִי בֵּ֥ית מְאַהֲבָֽי׃ פ
7 חֶ֗רֶב עוּרִ֤י עַל־רֹעִי֙ וְעַל־גֶּ֣בֶר עֲמִיתִ֔י נְאֻ֖ם יְהֹוָ֣ה צְבָא֑וֹת הַ֤ךְ אֶת־הָרֹעֶה֙ וּתְפוּצֶ֣יןָ הַצֹּ֔אן וַהֲשִׁבֹתִ֥י יָדִ֖י עַל־הַצֹּעֲרִֽים׃
8 וְהָיָ֤ה בְכׇל־הָאָ֙רֶץ֙ נְאֻם־יְהֹוָ֔ה פִּֽי־שְׁנַ֣יִם בָּ֔הּ יִכָּרְת֖וּ יִגְוָ֑עוּ וְהַשְּׁלִשִׁ֖ית יִוָּ֥תֶר בָּֽהּ׃
9 וְהֵבֵאתִ֤י אֶת־הַשְּׁלִשִׁית֙ בָּאֵ֔שׁ וּצְרַפְתִּים֙ כִּצְרֹ֣ף אֶת־הַכֶּ֔סֶף וּבְחַנְתִּ֖ים כִּבְחֹ֣ן אֶת־הַזָּהָ֑ב ה֣וּא יִקְרָ֣א בִשְׁמִ֗י וַֽאֲנִי֙ אֶעֱנֶ֣ה אֹת֔וֹ אָמַ֙רְתִּי֙ עַמִּ֣י ה֔וּא וְה֥וּא יֹאמַ֖ר יְהֹוָ֥ה אֱלֹהָֽי׃ פ
פירוש רש"י על זכריה י״ג
1 לְחַטַּאת וּלְנִדָּה. לְאַדְיוּתָא, וְכֵן תִּרְגֵּם יוֹנָתָן: ״אֶשְׁבּוֹק לְחוֹבֵיהוֹן כְּמָא דְמִדְכָּן בְּמֵי אַדְיוּתָא וּבְקִטְם תּוֹרְתָא דְחַטָּאתָא״ – בְּאֵפֶר חַטָּאת:
2 וְגַם אֶת הַנְּבִיאִים. ״נְבִיאֵי שִׁקְרָא״:
3 רוּחַ הַטֻּמְאָה. יֵצֶר הָרָע:
4 אַדֶּרֶת שֵׂעָר. כֵּן דֶּרֶךְ מְסִיתִים וּמַדִּיחִים, מִתְעַטְּפִים בְּטַלִּיתָם כְּאִלּוּ הֵם אֲנָשִׁים צַדִּיקִים, לְמַעַן יְקֻבְּלוּ כַּחֲשֵׁיהֶם:
5 כִּי אָדָם הִקְנַנִי. פָּתַר בּוֹ מְנַחֵם לְשׁוֹן מִקְנֵה צֹאן וּבָקָר בראשית כו:יד, כִּי אֲנִי כִּשְׁאָר כָּל אָדָם שֶׁאֵינוֹ עָסוּק בִּנְבוּאוֹת, הִפְקִידַנִי מִנְּעוּרַי לִשְׁמֹר אֶת מִקְנֵהוּ:
6 בֵּין יָדֶיךָ. בֵּין כְּתֵפֶיךָ, שָׁם מַלְקִין עוֹבְרֵי עֲבֵירָה מכות כב.:
7 בֵּית מְאַהֲבָי. אֲשֶׁר אֲהָָבוּנִי וְהוֹכִיחוּנִי לַדֶּרֶךְ הַיְשָׁרָה:
8 חֶרֶב עוּרִי עַל רֹעִי. עַל אוֹתוֹ שֶׁהִפְקַדְתִּיו עַל צֹאן גָּלוּתִי:
9 וְעַל גֶּבֶר עֲמִיתִי. שֶׁחִבַּרְתִּיו אֵלַי לִשְׁמֹר צֹאנִי כָּמוֹנִי:
10 הַךְ אֶת הָרוֹעֶה. אֶת מֶלֶךְ רוֹמִי הָרְשָׁעָה:
11 וַתְּפוּצֶינָה הַצֹּאן. שֶׁכְּבוּשָׁה תַּחַת יָדוֹ:
12 וַהֲשִׁבֹתִי יָדִי. וְאֶשְׁנֶה מַכּוֹתַי שֵׁנִית:
13 עַל הַצּוֹעֲרִים. עַל הַשִּׁלְטוֹנִים הַצְּעִירִים מִן הַמְּלָכִים. וְיוֹנָתָן תִּרְגֵּם וַתְּפוּצֶינָה הַצֹּאן ״וְיִתְבַּדְּרוּן שִׁלְטוֹנַיָּא״, וְתִרְגֵּם עַל הַצּוֹעֲרִים מְמֻנִּים שֶׁלָּהֶם הַשְּׁנִיִּים לָהֶם, וְכֵן תִּרְגֵּם יוֹנָתָן הַמִּקְרָא הַזֶּה בָּאֻמּוֹת ״חַרְבָּא אִתְגְּלִי עַל מַלְכָּא דְבָבֶל וְעַל שִׁלְטוֹנַיָּא חַבְרֵיהּ דִּכְוָתֵיהּ דְּדָמֵי לֵיהּ אֲמַר ה׳ צְבָאוֹת קְטוֹל יַת מַלְכָּא דְבָבֶל וְיִתְבַּדְּרוּן שִׁלְטוֹנַיָּא״. וְאֵין לְשׁוֹן הַתַּרְגּוּם הַזֶּה נוֹפֵל עַל יִשְׂרָאֵל, שֶׁלֹּא מָצִינוּ בְּתַרְגּוּם וּבְמִקְרָא שִׁלְטוֹנִין בְּיִשְׂרָאֵל אֶלָּא מֶלֶךְ וְשָׂרִים וְתַרְגּוּם שֶׁלָּהֶן ״רַבְרְבִין״:
14 וְהַשְּׁלִישִׁית יִוָּתֶר בָּהּ. יִתְגַּיְּרוּ וְיִחְיוּ:
15 וְהֵבֵאתִי אֶת הַשְּׁלִישִׁית בָּאֵשׁ. ״וְאָעֵיל יָת תְּלִיתָא בְּעָקָא בְּכוּר דְּאֶשָּׁא״, שֶׁיִּסְבְּלוּ וְיִשְׂאוּ מִקְצָת הַגֵּרִים מֵהָעוֹבְדֵי כּוֹכָבִים וּמַזָּלוֹת בְּצָרוֹת חֶבְלוֹ שֶׁל מָשִׁיחַ וּבְמִלְחֲמוֹת גּוֹג וּמָגוֹג עִם יִשְׂרָאֵל, וּמִשָּׁם יִבָּחֲנוּ כִּי גֵרֵי אֱמֶת הֵם. כִּי הַרְבֵּה מִן הַמִּתְיַהֲדִים תְּחִלָּה יָשׁוּבוּ לְסוּרָם וְיִתְחַבְּרוּ עִם גּוֹג, כְּמוֹ שֶׁאָמְרוּ בָּאַגָּדָה עבודה זרה ג::
16 וְהוּא יֹאמַר ה׳. כְּשֶׁיִּתְפַּלֵּל, יִתְפַּלֵּל לַה׳, וְלֹא לֵאלֹהָיו הָרִאשׁוֹן: